Horta Escolar

 

Horta escolar

O pasado venres fomos a nosa horta , porque o que sementa algo recolle, e alí atopamos as nosas acelgas, espinacas e leitugas, despois dalgunha contrariedade con paxaros e caracois (que tamén querían alimentarse da nosa horta)😂, fomos quen de recoller o plantado e levamos para a casa unha pequena mostra.

 Despois na aula contamos un dos nosos contos favoritos: “A mellor sopa do mundo” , o conto fálanos da AMIZADE, compartir, o respecto, axudar,…e que todo iso fainos sentir mellor, que son os valores que os Pelouros estamos traballando na aula.

 

Visita ao Mercado de Bueu

 

Visita ao Mercado

O pasado mércores os Pelouros achegámonos ata o mercado para poder aprender dun xeito máis vivencial e lúdico. Alí fomos ver os peixes da avoa de Adela que se parou moito connosco explicando moi ben todos os nomes e as características dos peixes: rapes , chinchos , fanecas , pescadas, salmón… Despois fomos atendidas por Marta e Zulema ( a mamá de Ainara) que nos ensinou  peixes e mariscos que aínda estaban vivos: centolas, navallas , lagostinos…Mais tarde visitamos a Sheila, a tía de Ainara , e entre as dúas amosáronnos máis peixes.

Despois visitamos a carnicería de Mari Chelo para coñecer os seus produtos: polo, carne , albóndegas…

Por último, visitamos a zona das froitas e verduras e como xa nos estaba entrando a fame despois de ver tanta comida, fomos convidados  a unha merenda no piso superior do mercado, con froitas, pan e doces do mercado.

Así , despois de repoñer forzas fomos quen de voltar ao cole , cansos pero felices te ter gozado unha experiencia tan enriquecedora.

Grazas a todas as persoas que colaboraron no Mercado para que esta visita fora posible.

 

23 Abril Día do Libro

 

Día do libro

O pasado domingo día 23 de Abril foi o Día do Libro.Para celebralo na aula os Pelouros trouxeron á clase o seu conto favorito e durante toda a semana pasada estivemos contando todos osa contos, e cada neno/a contou porque era o seu favorito e algún incluso foi quen de contalo aos compañeir@s. Despois cada nen@ fixo o debuxo do seu conto , que podedes ver exposto na porta de entrada do cole.

Para rematar,o luns fomos de visita ao Bibliocastelo no colexio de Primaria, visitamos a Papirus , a nosa mascota favorita, e tivemos unha sesión de contacontos: a profe Teruca contounos “A eiruga Larpeira” e a profe Toñi o conto de “Chuvisca”. Despois gozamos de ler libros na biblioteca e voltamos felices de ter celebrado ese día dun xeito especial.

 

Gamificación: Moito máis que xogo

 

Partindo do proxecto do colexio “Moito máis que xogo” os Pelouros tamén participaron no proxecto realizando na aula unha gamificación sobre o tema do xogo.

Empezamos recibindo na aula dos Pelouros unha carta de Papirus, o polbo mascota do noso cole, onde nos pedía axuda para salvar os xogos tradicionais porque debido ao uso de tablets , xogos de ordenador e consolas, corrían  o perigo de perderse.

Os Pelouros aceptaron o desafío de axudar a Papirus e mans a obra.

Papirus enviou un libro do seu Bibliocastelo sobre o pintor Bruegel e alí atopamos o seu cadro “Xogo de nenos” e, con lupas nas mans, os Pelouros foron identificando moitos dos xogos que alí aparecían.

 

De todos eles Papirus invitounos a xogar a 10 xogos e selar nun carné cada xogo  para ao rematar conseguir a medalla de campión ou campioa de Xogos tradicionais

 

O mestre de Psicomotricidade tamén participou xogando na súa clase cos: zancos, aros, a pita cega, as agachadas, bolos e outros máis.

Na aula e no patio tamén xogamos: a cadeira da raíña, os pelouros, ás agachadas, aos disfraces, coas monecas, pompas etc.

 

 

Xogamos e xogamos ede cada xogo traballamos algún aspecto do currículo: esquema corporal, o circulo, alto baixo, relación grafía cantidade…

 

Ao final conseguimos o tan ansiado premio: unha medalla feita coa impresora 3D do noso cole.

 

Con este proxecto comprobamos que xogando é a mellor maneira de aprender!